Maandenplant

De, tau de ollweltliche Gattung Jasminum (ca. 200 Oorten) gehürende Winter-Schesmin stammt ut de Gebirge in China (ü. a. ut de Provinz Sichuan) un gehürt tau de Ölbomgewächse (Oleaceae). Hei gelangte in`t 19. Johrhunnert in unse Parks un Gordens un ward hier vör allem wägen dei in de Wintermaande (Näbelmaand bet Lenzmaand) tahlriek rutkamenden Bläuten anplant. Siene 5 orrer 6 gälen Bläutenbläder sünd verwussen un billen `n bet tau 2 cm lange Kronruhre. Tau`n Gägendeil tau fast all` de annern Schesmin-Oorten rüken de Bläuten vun`n Jasminum nudiflorum nich.

`Ne Eigenoort för den Winter-Schesmin sünd de vierkantigen, gräunen Telgen, de gebögt dallingend bet upstiegend (bet tau 3 m hoch) wassen. Disse drägen gägenstännig anurdnete, dreitellig gefiederte Lowbläder. Sei warden in`n Harwst afschmäten. In uns Breiten süllte man de Oort an`nen schützten Urt (tau`n Bispill an `ne Muer) planten, dormit sei keinen Schaden bi starken Frost kriegen. In`t Frühjohr süll man sei düchtig trüchschnieden, denn bläuden sei ok schön.

In`n Botanischen Gorden stah`n twei grote Büsche up de Böschung an`n mittleren Diek.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.