Maandenplant

Ünner den`n Namen Sneistolt orrer ok Stiernblaum sünd in uns Gordens un Parks männig Oorten von de Gattung Chionodoxa bekannt. Sei sünd eng mit de Blaagstierns (Gattung Scilla) verwandt, de äbenso tau de Spargelgewächse (Asparagaceae) stellt warden. Alltauhop warden 6 bet 8 Oorten utenannerhollen, de in`t östliche Middelmeerrebeit (ü. a. Südwesten von`ne Türkei, Zypern) in männig Gebirge tau Hus sünd.

Bi all Oorten hannelt sick dat üm siede Zipollenplanten, de meist blot twei smalle Lowwbläder utbillen. De rad- bet tellerförmigen Bläuten kamen in uns Breiten von`n späden Winter bet in`t Frühjohr rut. Meistendeils stahn sei in twei- bet sößbläutigen Bläutenstänn`. All Chionodoxa- Oorten wiesen blaage Bläuten up, de meist `ne witte Midd hemmen. An`n meisten ward de „Gewöhnliche Schneestolz” (C. luciliae) tücht`t. Von disse Oort sünd verschiedene Kulturformen (ü. a. „Alba” mit reinwitte Bläuten) bekannt. De Sneistolt leiwt `nen lichten Standurt un wasst ganz einfach in Steingordens.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.