Maandenplant

De tau de Zitrusgewächse (Rutaceae) tellende Gattung Zanthoxylum umfött so an 200 Oorten, de vör allem in de Tropen vörkamen. Meistendeils hannelt sick dat üm sick tau Wehr settende (meist mit Stacheln, mal mit Durnen besett`te) Strüker orrer Böm. Bi poor Oorten is dat Holt gäl farwt un ward tau`n Farwen nahmen.

Dat Simulierende Gälholt is in de östlichen Rebeite von China un Taiwan tau Hus. As dicker Struk orrer lütter Bom ward hei woll so an 7 m hoch. De unpoorig fiederten Lowwbläder (disse warden in`n Harwst afschmäten) sünd dörchsichtig punkt`t un rüken aromatisch. De Sprosse un Bladdstängel hemmen Stacheln. In`n Mai (Wonnemaand) un Juni (Rosenmaand) kamen lütte, unschienbore Bläuten, de `ne gälgräune Bläutenhüll hemmen, rut. Ut ehr wassen kugelige, rode Früchte (3–4 mm in`n Dörchmesser), in de sick swatte Samen befinnen. De Fruchtschalen von Z. simulans un annere Oorten von disse Gattung rüken `n bäten scharp-würzig un gäben den as Gewürz brukten Szechuan-Päper her. Hei is oewer nich mit den`n Swatten Päper (Piper nigrum) verwandt.

In`n Botanischen Gorden steiht `ne olle Plant an de Weggabelung oewer de Brügg bi den`n middleren Diek.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.