Maandenplant

As exotische Strüker orrer Böm warden de Magnolien in Middeleuropa wiererhen as Schmuckholt plant. De ca. 220 Oorten von de Gattung Magnolia (Magnoliaceae) stammen ut den`n Osten von Nuurdamerika un ut Ostasien (vör allem ut China un Japan). In Europa sünd de Magnolien in de letzte Iestiet utstorben un blot fossil oewerliefert. Plant warden sei wägen ehrer upfälligen, oft eis groten Bläuten.

Bi de Ümmergräune Magnolie hannelt sick dat üm eine in`n Südosten von den USA (Carolina, Florida, Texas) tau Hus sienende Bomoort. Bet vör ungefiehr 30 Johr würd` disse Oort in Dütschland binah blot as Kolthusplant anschafft. Intwüschen (de Klimawannel makt dat möglich) is disse prächtige Bom ok in uns Breiten in Parks un Gordens wiet verbreit`t. Disse bet tau 30 m hoge Oort besitt wesselstännig anurdnete, ledderorrige Lowwbläder, de mihr as 20 cm lang warden können. Babenup sünd sei glänzend–dunkelgräun, de Unnersiet is rostfarwig-filzig.

Mit `nen Dörchmesser von oewer 20 cm sünd de von Mai (Wonnemaand) bet Juni (Heumaand) rutkamenden Bläuten ganz schön grot. Von ehr geiht ein gauder (schöner) Rük ut. Binnen von de Bläuten finnen sick väle Stoffbläder un Fruchtbläder. Ut de Fruchtbläder kamen Sammelbalgfrüchte rut, de rötliche Samen inschluten. Tau`n Planten gifft dat naug verschiedene tücht`te Sorten.

In`n Botanischen Gorden wasst de Magnolia grandiflora ganz in`t westliche Rebeit twischen de Morphologische Afdeilung un den `n Hochschaulgorden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.