Maandenplant

De Körbsgewächse (Cucurbitaceae) ümfaten ca. 900 Oorten, de vör allem as Kladderplanten in warme Rebeite vörkamen. De Gattung Cucurbita schlött so üm ein Dutzend Oorten in. Disse kamen vör allem in`t tropische Amerika vör. De bekannteste un wirtschaftlich wichtigste Oort is C. pepo, de Körbs. Disse wür all vör oewer 9000 Johren in Middelamerika anbugt. Körbse hemmen Panzerbeern. Ehre Grött, Form un Farw kann ganz oft ünnerscheidlich sien.                                      

Eng verwandt is de Feigenbladd-Körbs, de blot selten anbugt ward. Dat hannelt sick üm `ne einjöhrige Oort, de ehr Spross kladdern orrer up de Ierd krupen. De weik behoorten Planten drägen grote hartförmige bet rundliche, langstälige Lowwbläder. Tau`n Kladdern helpen drei- bet vierdeilige Ranken. Ehre trenntgeschlechtlichen Bläuten besitten `ne glockenorrige Kron, de gäl bet blass-orange farwt is. De oval-rundlichen Früchte können einen Dörchmesser von ca. 20 cm un ein Gewicht von 5 bet 6 kg hemmen. In jed ein Körbs warden ungefiehr 500 swatte Samen ranwassen. De hell- orrer dunkelgräunen Körbse wiesen helle Striche orrer Striepen up. Wenn de Körbse noch nich ganz riep sünd, kann man sei sogor as Gemüse äten.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.