Maandenplant

De Gattung Eschscholzia umfött 10 Oorten, de in`n Westen von Nuurdamerika meistendeils in de drögen Rebeite tau Hus sünd. Dörch de Uptucht is de E. californica an`n wiedesten rümkamen. De sihr formenrieke Oort stammt ut Kalifornien (dor is sei sogor de Staatsblaum) un Oregon. Sei wiest `ne Wuchshöh` von 30 bet 60 cm up un besitt blag-gräune, fien terdeilte Lowwbläder. Ehre upfällig lüchtenden gälen, an`n Grunn` orange-roden, schalenorrigen Bläuten hemmen `nen Dörchmesser von 5 bet 8 cm. Sei kamen bi uns so von Heumaand bet Harwstmaand rut, wurbi sei sick blot bi Sünnenschien updaun. De Bläuten besitten twei Kelchbläder, de mützenorrig baben up de sick upmakenden  Bläutenknuppens sitten. Wenn sick de Kronenbläder updaun, denn warden de Kelchbläder afschmäten. De in de Mird stahende Fruchtknuppen ward von väle Stoffbläder ümgäben. Von Austmaand bet Harwstmaand riepen de bet tau 10 cm langen Schoten. All Deile von dit Mahngewächs sünd giftig!

De Kalifornsche Mahnblaum (ü. a. ok Güllenmahn orrer Slapmützchen nennt) is ganz bescheiden. Sei brukt nich väl. Oewer sei leiwt `nen sünnigen Standurt up`n dörchlässigen Bodden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.