Maandenplant

Mit ca. 350 Oorten is de Gattung Limonium in`t gesamte Rebeit von uns Nuurdhalwkugel, oewer ok in Südafrika un Australien verbreit`t. De as Strandfleeder beteikneten Oorten gehüren tau de Bleiwurzgewächse (Plumbaginaceae). Sei wassen vör allem an de Meeresküsten un verdrägen bannig hoge Soltandeile in`ne Ierd.

De Geflügelte Strandfleeder is `ne typische Oort in`t Middelmeerrebeit (von Portugal oewer Nuurdafrika bet na Vörderasien). Dat hannelt sick üm `ne meistendeils utduernde Oort, de dicht behoort is. Ehre fiederspaltig-gelappten Bläder stahn in `ner grundstännigen Rosett`, oewer dei de bet tau 40 cm hoge Stängel wasst. De gabelig deilten Bläutenstänn` sünd 3 bet 5 flügelig. De Flüchten billen smalle tauspitzte Lappens. Von Wonnemaand bet Harwstmaand kamen de in an`n Enn` stahenden Oren anurdneten Bläuten rut. Sei besitten `n Kelchruhr mit `n blaagvigeletten Quadder un `ne hinfällig` Kron`. Sei is gäl, witt orrer rosa farwt.

Väle Formen von den`n GeflügeltenStrandfleeder warden giern as Schnittblaumen un in Drögstrüße nahmen. As Sommerblaum benödigt disse Oort `nen warmen Standurt un dörchlässige Ierd. Sei finnen disse Plant in`n Botanischen Gorden in de Morphologische Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.