Maandenplant

Sneimaand 2013: De Kannenplant (Nepenthes spp.)


De Kannenplant Nepenthes kümmt in de Tropen von de Olle Welt vör. Dat Flach reikt von Madagaskar oewer Südostasien bet in den Nurdosten von Australien.

As Fleeschfretter gahn dei Kannenplanten mit Gleitfallen up den Fang. Bi disse Gleitfallen hannelt sick dat üm ümbild`te Lowbläder, bi de sick de Blattspreit` tütenorrig inrullt hett. De Fallen können `ne Läng` von oewer 30 cm hemmen un sünd dörch `nen Deckel krönt. De Fallenrand (Peristom) is oft eis upfällig farwt un drägt Duftdrüsen. De Beutediere (meistendeils Insekten) warden dormit anlockt un rutschen von`n bannig glatten Kannenrand in dat Innere von de Kann`. Dor lannen sei in `nen Verdauungssaft un warden uplöst. De friesett`ten Nährstoffe warden denn von de Kannenplant upnahmen. In`t Tropenhus von de Loki-Schmidt-Gewächshüser wassen mihrere Oorten an`n Upstieg tau de lütte Anhöh`.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.