Maandenplant

Austmaand 2015: De Swatte Mulbeerbom (Morus nigra)


De Swatte Mulbeer` is ein vun de teihn Mulbeerbomoorten, de dat Warme leiwen. Sei kümmt ut de Familie vun de Mulbeergewächse (Moraceae) un wasst up de nördliche Halwkugel in de gemäßigte un ok in de subtropische Zon`. All` Oorten führen Melksaft un hemmen wesselstännige ungedeilte Lowbläder, de in`n Harwst afsmetten warden. De Bläuten stahn in groter Tahl in walzenorrigen Bläutenstänn`. Ehre Hüllbläder warden, wenn sei riep sünd, fleischig un dorbi kriegen sei `nen brummelbeerorrigen, ätboren Sammelfruchtstand.

De leicht gammlig wardenden Swatten Mulbeeren möten glieks tau Saft orrer Marmelad` verarbeit`t orrer drögt warden. Wat Besonneres is ok noch, dat in de Tied vun Juli bet September (Gewiddermaand bet Harwstmaand), wenn je ehre Fruchtperiod` is, ümmertau na un na wiedere Früchte riepen. De grote Bedüdung vun den Mulbeerbom besteiht jedoch in`n Gebruk as Fauder in de Siedenrupentucht. Dat führte dull tau de Verbreidung vun de Swatt- un in`t Besonnere vun de Witt Mulbeer (Morus alba) ok in Mäkelborg-Vörpommern. So ok tau de Tucht vun `ne grote Tahl an anner Sorten.

De bet tau 12 m hoge Swatte Mulbeer stammt ut Westasien un is in`t Middelmeerrebeit inbürgert, wieldat sei all vun olle Tieden an hier brukt ward. In`n Botanischen Gorden stahn `ne olle Swatte Mulbeer an de Offizinellen Afdeilung un `ne Witte Mulbeer an`n Tun vun den`n Gorden bi`n middleren Diek.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.