Maandenplant

To de Gattung von de Zaubernuss hürn blots fief sommergräune Orten vun Strüker, de natürlicherwies in de Gägend vun Nurdamerika un Ostasien vörkamen un wo lauschiget Klima is. Se stahn oft eens in’n Harwst/Winter – un denn mihrere Wäken lang – in voller Bläut. Näben de kakelige Bläuten mit je veer fiene gäl bät rode Kronbläder beiden uns de Strüker ok kräftige gäle bät rode Lowbläder in’n Harwst. De holtige Fruchtkapseln hüppen mit ‘ner groten Spannung up, dat de Samen bät to 10 m wiet schmäten warden.

De Hamamelis-Orten wassen mihrstens in’n lichten Ünnerwuss in Bargholt un dörpen dorüm nich an Urte anplant warden, de tiedwielig utdrögen. Rinn un Bläder vun de nurdamerikanischen H. virginiana wirken dörch denn Garwstoff Hamamelitannin besünners stark tosamentreckend un entzünnungshemmend. Dorüm ward se oft in Salben un Cremes to Wundbehannlung anwendt. En grotet Exemplar von de Japanische Zaubernuss (H. japonica) steiht in’n Botanischen Gorden dicht bi’t Reetdackhus in’n Japangorden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.