Maandenplant

Gewiddermaand 2018: De Prachtschart´ (Liatris spicata)


Bi de in`n östlichen Deil von Nuurdamerika wassende Prachtschart` hannelt sick dat üm `ne utduernde krutige Oort. De Gattung Liatris ümfött mihr as 30 Oorten, de vör allem an apene, besünnte Standurte vörkümmt. As Schmuckplant (inschlaten de Verwennung as Schnittblaum) ward in uns Gordens un Parks de Liatris spicata anplant. Disse Oort kann bet oewer 1 m hoch warden. Ehre meistendeils nich vertwiegten Stängels drägen wesselstännig anurdnete, grasorrige Lowwbläder. In`n Hochsommer kamen de as `ne Ohr utseihenden Bläutenstänn` rut, de sick wedder ut tahlrieke Deilbläutenstänn` tausamensetten. Disse wiesen `ne Läng von so bi 1 cm rüm up. De Kronbläder von disse Röhrenbläuten sünd rosa bet rod (sprangwies witt) farwt.

In Middeleuropa warden vör allem de Boddervagels, oewer ok Immen un Plüschmors as Bestäuber anlockt. Sünnerbor is de Upbläuhfolg` bi de Prachtschart`! Sei folgt von baben na unnen. Lat in`n Sommer riepen denn de Noetfrücht, de `nen Pappus as Flugorgan besitten. As Gordenplant is de Prachtschart` ganz taufräden. Sei benödigt blot `nen warmen un recht sünnigen Standurt.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.