Maandenplant

De Gattung Lagerstroemia gehürt tau de Blautwiederichgewächse (Lythraceae) un kümmt mit mihr as 50 Oorten in´t tropische Asien vör. Dat hannelt sick üm Böm un Strüker. De undeilten Lowwbläder sünd gägen- orrer wesselstännig anurdnet. Die Bläuten stahn in rispig orrer traubig anurdnete Bläutenstänn´. De Bläutenfarf is rosa, purpur orrer witt. Sei könen 2–5 cm Dörchmesser erreiken. Dei Antahl von de Kelchbläder bedrägt 6–9. Dei meist 6 wellig-krusen Kronbläder sünd lang nagelt. Dei tahlrieken Stoffbläder sünd an´n Grund von de Bläutenröhr infügt.

Wägen ehre statschen Bläuten sünd verschiedene Kräuselmyrten-Oorten as Ziergehölze in den Tropen un Subtropen beleiwt. Dat gellt besonners för L. indica, de ierst ut dat tropische Asien stammt. Disse Oort kann bi uns as Kolthusplant hollen warden. In schützte Rebeite kann sei in´n Sommer in´n Friegen anbucht warden.

In´n Botanischen Gorden steiht Lagerströmia indica as Sort World´s Fair up dat Flach vör de Loki-Schmidt-Gewächshüser.

Plattdütsch: Eva Dittberner, Vereinsmaat in'n Plattdütsch-Verein Klönsnack-Rostocker 7 e.V.