Maandenplant

De Sneiglöckchenbom is in`n Osten von de USA (vör allem in Tennessee un Georgia) tau Hus, wur hei besönners in de Bargwälder vörkümmt. Hei gehürt tau de Gattung Halesia, de tau de Styraxbomgewächse (Styracaceae) tellt. Bi H. monticola hannelt sick dat üm `nen sommergräunen Bom, de oewer 30 m hoch warden kann.

Tausamen mit de undeilten, eiförmigen Lowwbläder kamen de Bläuten von April (Ostermaand) bet Mai (Wonnemaand) rut. De hübschen, glockenglieken Bläuten stahn in achselstännigen Büscheln an`t vörjöhrige Holt. Sei sünd witt un besitten `ne vierdeilige Kron. Ut ehr wassen geflügelte Steinfrüchte. Sei warden bet tau 5 cm lang.

Tau de Bläutiet süht de Sneiglöckchenbom wunnerschön ut. In uns Parkanlagen un Gordens is hei twors blot sprangwies tau seihn, wieldat hei väl Platz benödigt, üm tau vullen Pracht tau kamen. Hei leiwt sünnige bet halwschattige Stellen mit dörchlässige, humose Ierd. In`n Botanischen Gorden steiht ein groter Bom in de Nuurdamerika-Afdeilung von dat Alpinum nich wiet af von dat Schilfdackhus.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.