Maandenplant

De Heidekrutgewächse (Ericaceae) ümfaten ü. a.de Gattungen Erica un Rhododendron mit jeweils hunnerte Oorten. Meistendeils sünd de mihr as 800 Erica-Oorten Zwergstrüker (blot selten ok Böm). In Südafrika find`t man de meisten.

Tau de relativ wenigen in Middeleuropa inbörgerten Verträder von de Gattung Erica tellt de Glockenheid` (ok Muurheid` nennt). Disse in Nuurd- un Westeuropa vörkamende Oort wasst vör allem up Torfmuure un feuchte Wischen un is dorüm selten worden. Ehre verholzten Twiege können bet tau 40 cm hoch warden. De ümmergräunen, nadelförmigen Lowwbläder sünd bet tau 6 mm lang un an`n Rand ümrollt. In de Tiet von Juni (Heumaand) bet September (Harwstmaand) kamen de ruhr-kraugförmigen Bläuten rut. Sei wiesen `ne rosarode Farw up un stahn tau 4 bet 8 in endstännigen Dolden tausamen. In`n Gordenhannel gifft dat verschiedene Formen (ü. a. mit witte Bläuten) tau köpen. In`n Harwst wassen Kapselfrüchte ran, in de väle sihr lütte Samen liggen.

As Gordenplant leiwt de Glockenheid` nährstoffarme, sure un feuchte Ierd. In`n Botanischen Gorden wasst de Muurheid` in de Systemische Abteilung noch vör den`n Urweltmammutbom.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.