Maandenplant
Sneimaand 2025: De Queensland-Kaurificht (Agathis robusta)
De Gattung Agathis tellt tau de Araukariengewächse (Araucariaceae), de up de Südhalwkugel von uns Ierd verbreit`t sünd. De Kauri-Böm kamen in`t pazifische Rebeit vör (von Malaysia bet Neuseeland). Tau de Gattung Agathis gehüren so an 15 Oorten, bi de sick dat üm harzrieke, hoge Böm hannelt.
De Queensland-Kaurificht stammt ut den`n tropisch-subtropischen Nuurdosten von Australien un ok ut den`n Osten von Papua-Niegguinea. Dat hannelt sick üm ümmergräune Böm, de bet tau 50 m hoch warden können. De Stämm` können `nen Dörchmesser von oewer 1,5 m kriegen. Ehre meistendeils kort stäligen Bläder sünd dick un stief. Sei kriegen `ne Läng` von 12–18 cm un warden so an 3 cm breit. De männlichen Tappens sünd zilinnerorrig un bet 10 cm lang. De wieflichen Tappens sünd kugelig bet zilinnerorrig un bet 15 cm lang. Ut ehr kamen väle as ein Hart formte Samen hervör.
In`n Botanischen Gorden steiht de Queensland-Kaurificht as Tuppenplant in`t Sukkulentengewächshus.
Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.