Maandenplant

De Gattung Datura gehürt tau de Nachtschattenplanten (Solananceae) un ümfött runn´ ein Dutzend Oorten. Dat hannelt sick üm krutige Verträder, de in Nurd- un Middelamerika tauhus sünd. Ein poor Oorten (u. a. D. stramonium) gell´n as invasiv un sünd intwüschen fast weltwiet verbreit´t. De ganzen Stäkappeloorten sünd Giftplanten.

De Gemeine Stäkappel kümmt ut Nurdamerika. Dei einjöhrige Oort erreikt ´ne Höcht bet tau 1,2 m. Ehre Lowwbläder sünd bet 20 cm lang un eiförmig. Af Juni (Johannismaand) bet in den Harfst hen erschienen dei Bläuten. Dei Bläuten stahn in den Twälen un an de Spitz von de Twiegen. De Kelchbläder sünd halw so lang as de Kron. Die witte Kronröhr is as ein Trichter formt un bet tau 10 cm lang. Bi dat Aft hannelt sick dat üm ´ne Kapsel, dei bet tau 5 cm Längde erreikt. De Nam Stäkappel betreckt sick up die tahlrieken groff Stickeln, dei bi dat Aft upsitten. 

Besonners as Weidunkrut is de Stäkappel all siet Johrhunnerte in unse Flora verträden un trät dank siener langläbigen Samenbänk in´n Bodden ok na langer Tiet ümmer wedder up. In´n Botanischen Gorden steiht hei in de Offizinellen- un Morphologischen Afdeilung.

Plattdütsch: Eva Dittberner, Vereinsmaat in'n Plattdütsch-Verein Klönsnack-Rostocker 7 e.V.