Maandenplant

De Gattung Cydonia umfött blot eine Oort (C. oblonga), de tau de Rosengewächse (Rosaceae) gehürt. Binnen von disse Familie is de Quittenstruk orrer Quintappel oewer nehger mit de Appels un de Beern verwandt un gehürt as disse tau de Karnawtgewächse. Hei stammt taufödderst wohrschienlich ut dat Kaukasus Rebeit un wür all vör dusende von Johre dörch den Minschen in annere Rebeite inführt. Ok in Middeleuropa wasst de Quintappel ahn Maless, wenn hei as fruchtdrägende Oort in väle Gordens anplant ward.

De Quitten wassen struk- bet bomförmig un können oewer 6 m hoch warden. Wieldat sei so upfällige witte bzw.hellrosa farwten Bläuten hemmen, warden sei ok as Ziergehölze uptreckt. De bet tau 5 cm in`n Dörchmesser grot wardenden Bläuten sünd von Wonnemaand bet Heumaand tau seihen. Ut ehr billd`t sick `n gälet Schienawt. Na ehr Form ünnerscheiden wi mihrere Sorten. An`n bekanntesten sünd Appelquitten un Beernquitten. Sei warden in`n laten Harwst (Wienmaand, Näwelmaand) afplückt. Meistendeils können sei nich roh äten warden. Sei möten kakt warden un ut ehr ward ü. a. Mamelad, Gelee orrer Quittenbrot makt. Ein groter Quittenbom steiht twischen de Gabionen-Muern tau`n Hochschaulgorden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.