Maandenplant

Tau de alleriersten Frühjohrsblaumen gehürt bi uns de Winterling. Siene gälen Bläuten kamen all in`n Hornung orrer Lenzmaand rut. De tau de Hahnenfautgewächse (Ranunculaceae) tellende Gattung Eranthis umfött` 8 Oorten, de in`n Süden Europas tau Hus sünd. Ok de Winterling E. hyemalis stammt von dor un is in Middeleuropa siet 1570 in Kultur nahmen worden. Intbesonnere in Parks is de Oort bi uns beleiwt, wieldat sei gäle Bläutenteppiche billd`t. Vör allem in`n Süden von Dütschland kümmt de Winterling so af un an sogor verwildert vör.

Dat hannelt sick bi disse Oort üm `nen Geophyten, de `n knolliget Rhizom upwiest. Oewer de Ierd kümmt `n unvertwiegter Trieb rut, de `ne wirtelig-välspaltige Hochblatthüll` drägt. Disse ümhüllt eine einzige Bläut. De schalenförmige, zwittrige Bläut besitt` `nen Dörchmesser von so bi 3 cm. In de Bläut finnen sick tahlrieke tütenförmige Nektarbläder, Stowwbläder un ünnereinanner friege Fruchtbläder. Pro Bläut wassen bet tau 8 Balgfrücht, de mihrere Samen in sick hemmen können. De Lowwbläder hemmen `nen Stäl un sünd as `ne Hand deilt. Na dat Bläuhen starben de oewerierdischen Deile furtsens af. De Winterling stellt keine besonneren Ansprüch` an den Acker un leiwt schattige Stellen. All Deile von de Plant sünd giftig! In`n Botanischen Gorden wassen väle Winterlinge üm den groten Urweltmammutbom an`n Pankow-Rondell.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.