Maandenplant

De Kienböm gehüren tau de wichtigsten Forstböm un Schmuckböm up de ganze Welt. Tau de Gattung Pinus (Pinaceae) tellen so an 110 Oorten. Tau de an mihrsten verträdene Oort tellt de Wald-Kienbom (Pinus sylvestris), de mihrstens up apene un dröge Rebeite wasst. 

Verwandt is mit em de Swatt-Kienbom, de vör allem in`t Middelmeerrebeit wasst. Dat gifft väle Afwandlungen in disse Oort, de sick ü. a. in ehr äußere Gestalt ünnerscheiden. Disse Oort is as Forstbom von groter weltwieder Bedüdung. As staatschen Bom kann hei bet tau 45 m hoch warden. De Stammdörchmesser kann mihr as 1,5 m sien. Öllere Böm besitten `ne schuppige Bork. Dat Holt wiest grote Harzkanäle up. De Swatt-Kienbom besitt Nadelbläder, de je na Afwesslung 3–20 cm lang warden können. Sei stahn ümmer tau tweit an de Kortsprosse. De Bläutenzappen kamen in de Frühjohrsmaande rut. 

In`n Botanischen Gorden steiht ein Swatt-Kienbom an`n Rand von dat Alpinumrebeit Südliche Kalkalpen un twei in de Kienbomafdeilung von dat Arboretum. Ok in de Gräunanlagen von Rostock un Warnemünn` drapen wi ümmer wedder up grote Swatt-Kienböm.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.