Maandenplant

`Ne ganze Reihg von Vörjohrbläuhern tellt tau de Familie von de Hahnenfautgewächse (Ranunculaceae). Dortau tellen ü. a. dat Scharbockskrut, Fettbläder, Gälgössel (Ranunculus ficaria) un dat Wittööschen (Anemone nemorosa). De Gattung Anemone umfött ca. 150 Oorten, de vör allem in Eurasien wassen. Dat hannelt sick meistendeils üm utduernde Stauden, de oft ganz hübsche Bläuten besitten.

Besünners in`t östliche Middelmeerrebeit sünd poor Anemone-Ooerten tau Hus, de wägen ehr hübschet Utseihn all siet langem as Gordenplanten hollen warden. Dat Balkan-Ööschen wasst ü. a. up den Balkan, in de Türkei un up Zypern. Dorbi warden apene Felsflure un Nadelholt besiedelt. De himmelblagen Bläuten von de bet tau 25 cm hogen Planten kamen in`n März (Lenzmaand) un April (Ostermaand) rut. Von disse sihr verschiedenortige Oort gifft dat ok Formen mit dunkelblagen, rosa un witten Bläuten. Ehre gestälten Lowwbläder sünd deilt. Wenn se verbläuht sünd, trecken sick de Planten in.

Man süll de Blaumen in`n Halwschatten planten un in`n Winter `n bäten schützen. In`n Botanischen Gorden wasst Anemone blanda in de Varietät Atrocaerulea gliek an`n Beginn von de Ümmergräunen-Afdeilung nich wiet af von de Offizinellen-Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.