Maandenplant

De Wittduurn (Mählbeerbusch, Mählduurn) gehürt tau de Gattung Crataegus innerhalw vun de Rosengewächse (Rosaceae), de je na Upfatung 140–250 swor tau ünnerscheidende Struk- un Bomoorten umfött. De meisten Oorten de up de gesamte Nuurdhälft vun uns Ierd beheimatete Gattung stammen ut Nuurdamerika. In Middeleuropa gifft dat blot ein halw Dutzend Oorten, vun de de Eingriffelige Wittduurn (C. monogyna) un de Tweigriffelige Wittduurn (C. laevigata) an`n wiedesten verbreit`t sünd. Bi de sommergräunen Crataegus-Oorten in Middeleuropa kümmt mit dat Utdrieben vun de gelappten Lowbläder in`n Frühling eine witte bet rosa Bläutenpracht (ähnlich vun lütten Appelbläuten) rut. Dorüm sünd sei as Ziergehölze sihr beleiwt. De sick ut de Bläuten enwickelnden Noet-appelfrüchte sünd allermeist rötlich orrer schwärzlich farwt.

De Wittduurn ward oft as Heck` plant. Dicht mit wehrhafte Duurnen besett, können disse Hecken einen schönen Bruutplatz innerhalw vun `ne Stadt för tahlrieke Vageloorten billen. De Wittduurn is in sien Lag` un Bodden nich anspruchsvull. Allerdings is hei anfällig gägenoewer vun Krankheitsoewerdräger (u. a. Schadpilze as Füerbrand), de Probleme in`n Awtanbu maken können. In`n Botanischen Gorden stah`n Wittduurn-Strüker östlich näben de Offizinellen-Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.