Maandenplant

De tau de Nachtschattengewächse (Solanaceae) tellende Enzianstruk stammt ut Südamerika (Paraguay, Argentinien) un ward as hübscher Struk hüt weltwiet in de Tropen un Subtropen in de Parks un Gordens anplant. De Oort is mit de Tüffel verwandt un wür iergistern in de Gattung Solanum stellt. In uns Breiten ward L. rantonnetii as Tubbenplant hollen. Sei kann bet tau 2 m hoch warden.

De ganzrandigen Bläder sünd dicht behoort un `n bäten breider lanzettlich. Disse hübsche Schmuckplant hett assenstännige Bläuten, de in `ne Grupp von 2–5 Bläuten wassen. De Bläuten können `nen Dörchmesser von 3–4 cm hemmen. Dull hübsching sünd de blag vigeletten Kronenbläder un de in de Mird von de Bläuten stahenden gälen Stoffbläder antauseihn. Lat in`n Sommer kann man de roden, binah appelgroten Früchte bewunnern. Oewer vörsichtig, de stahn in`n Verdacht, giftig tau sien. De Enzianstruk kann tämlich leicht dörch Stecklinge vermihrt warden. Sogor all ganz lütte Planten können tau bläuhen anfangen. In de Wintermaande kann de Oort an`ne käuhle (5–10 °C) un helle Stell hollen warden.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.