Maandenplant

De Echte Papyrus gehürt tau de Familie vun de Suergräser (Cyperaceae). De utduernde Oort is `ne Charakterplant in de afrikanischen Feuchtgebiete. Intbesönnere an den Nil lang, kann de Papyrus sihr dichte un binah undörchdringliche Bestänn` billen. In Europa is C. papyrus blot up Sizilien tau Hus. De afrund`ten dreikantigen Halms können 2-5 m hoch warden. An ehre Spitz drägen sei `nen riek bläudenden Stand un de spreitenlosen Lowbläder. De unschienboren Einzelbläuten wassen in lütte Ährchen anurdnet.

All in ganz olle Tieden, in`t Altertum, is de Echte Papyrus as Nutzplant bekannt. För de Herstellung vun Papyrus ("Papier des Altertums") würd` dat Mark ut de Halms brukt. Oewereinannerleggte Markstriepen verkläben un billen up disse Wies` flache Stücken, de beschräben warden können. Tahlrieke archäologische Funn` betügen, dat Papyrusrullen `ne bemarkenswierte lange Holtborkeit besitten (oewer 3000 Johre!). De Echte Papyrus besitt ok as Zierplant grote Bedüdung. As Zimmerplant kann de Oort bi uns in `nen mit Wader füllten Küben (Pott) an `nen hellen Urt hollen warden. In`n Botanischen Gorden wasst C. papyrus an`n Rand vun dat Waderbecken in de Loki-Schmidt-Gewächshüser.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.