Maandenplant

De tau de Familie von de Bleiwöddelgewächse (Plumbaginaceae) tellende Gattung Armeria umfött ca. 100 Oorten, de vör allem in de Nuurdhalwkugel wasst un bet in de Anden un na Füerland reikt. Wur väle annere Verträder von de Bleiwöddelgewächse wassen ok väle Armeria-Oorten up Solt- (tau`n Bispill an Meeresküsten) un Swormetallierd up. Hier oewerläben sei hoge Wierte von Solt un Swormetall, de je för de mihrsten Planten up den Dod giftig sünd.

De sihr formrieke Strand-Grasnelk kümmt mit välen Unneroorten up Dünen un Soltwischen an de Nuurd- un Ostseeküst vör. Sei gifft dat ok up dröget Gras un up Felsgestein. De 10–30 cm hoge Staud besitt längliche, grasorrige Lowwbläder. Von Heumaand bet Wienmaand kamen de runnen Bläutenstänn rut. De Kronbläder von de Bläuten sünd rosa- bet purpurfarwen. In uns Gordens kann man väle niege Tüchtungen von de Strand-Grasnelk finnen.

In`n Botanischen Gorden wassen mihrere Unneroorten un Formen von de Strand-Grasnelk in`t Alpinum, in`n Sanddröchrasen un in`n Staudengorden näbenan.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.