Maandenplant

Wenn wi an Kakteen (Cactaceae) denken, hemmen wi dat Bild von so `ne kugelrunn`, wadersammelnde un dull bedurnte Plant vör uns. Oewer in Wohrheit hannelt sick dat bi de mihrsten Kakteen üm sukkulente Verträder, de in de Wüsten un Halwwüsten von Nuurd-, Middel- un Südamerika wiet verbreit`t sünd. Tau disse tellen ü. a. de von de Kakteenfans schätzten Gattungen Mammillaria un Parodia.

Tau bemarken is, dat `ne lütt Grupp von Kakteen as Upsitterplanten (sog. Epiphyten) in de tropischen Wälder in de Niege Welt läwt. Dortau tellt ok de Wihnachtskaktus (Schlumbergera) un de Rutenkaktus (R. baccifera). Man nömt em ok Binsenkaktus. As einzige Kakteenoort is R. baccifera ok uterhalw von de Niegen Welt verbreit`t. Sei find`t sick up natürliche Wies ok in Afrika un Sri Lanka. Sei besitt dalbammelnde, runne Utschosse, de mihrere Meter lang warden können . Sei drägen korte, helle Bösten. Ut de lütten witten Bläuten billen sick witte bet rosafarwte Beerenfrüchte.

In `n Botanischen Gorden wasst de Rutenkaktus in`t Sukkulentenhus.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.