Maandenplant

Näben Ostasien is Nuurdamerka ein Hauptpunkt von de verschiedensten Ahurn-Oorten. De Gattung Acer (Sapindaceae) umfött mihr as 100 Oorten. Mihrstendeils hannelt sick dat üm Böm, de ehr Lowwbläder  in`n Harwst mihrstens ganz dull gäl-orange-rod verfarwen, bevör sei disse afschmieten.

De Oregon-Ahurn, ok Näsenklemmerbom, is in`n pazifischen Nuurdwesten von Nuurdamerika (südlichet Alaska bet nuurdlichet Kalifornien) tau Hus. Dor wasst de Oort so oewer 30 m hoch. Oewer in Middeleuropa wasst sei man oft strukorrig. De Stämm` können `nen Dörchmesser von oewer 2 m kriegen. De groten Lowwbläder (dorher ok de Nam` Grotblädriger Ahurn) sünd bet tau 20 cm lang un bet 30 cm breit. Sei sünd fieflappig, wurbie de böbelste Lappen nochmal lappt is. In`n Mai (Wonnemaand) un Juni (Braakmaand) kamen de drubenorrigen bet rispigen Bläutenstänn` rut. Sei drägen väle lütte, gäl-gräune Bläuten. De tweideiligen Noetfrüchte sünd flüchtenorrig.

In`n Botanischen Gorden steiht ein Bom von 1939 in de Ahurn-Sammlung achter dat Pankow-Rondell.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.