Maandenplant

De Gattung Clavija kümmt in de Neotropis vör un hett ehre Hauptverbreidung in de Karibik. Früher würden de ca. 50 Oorten von de Gattung Clavija in de Theophrastaceae stellt. Doch nu tellt de Gattung tau de Primelgewächse (Primulaceae). Dat hannelt sick üm bomorrige Oorten, de in de Rägenwälder wassen.

Bi Clavija macrophylla hannelt sick dat üm `ne ümmergräune Oort, de 3–5 m hoch ward. An ehre Spitz drägen de Böm einen upfälligen Bläderkopp. De undeilten Lowwbläder können bet tau 50 cm lang warden. Sei billen `ne na baben apene Bladdrosett`, de an`n heimatlichen Urt tau`n Upfangen von Plantenresten ut de böbelsten Kronen deint. Up disse Wies` können Nährstoffe „upfangen“ warden. De rötlich-orange farwten Bläder stahn in välbläutigen ca. 30 cm langen Druben. Disse sünd ofteis eingeschlechtlich un hemmen `nen Dörchmesser von ungefiehr 1,5 cm. 

Dat hannelt sick hier üm klassische Warmhusplanten, de in unsen Privathusholt blot schwer tau hollen sünd. In`n Botanischen Gorden wasst eine Plant in`t Tropenhus gliek an`n Anstieg von`n Weg.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.