Maandenplant

De Gattung Ruta umfött ca. 7 Oorten, de vör allem in`t Middelmeerrebeit antaudrapen sünd. Sei gifft för de Familie Rutaceae den Namen. Dortau tellen ü. a. ok de Zitrusgewächse (Citrus spp.) un de Diptam (Dictamnus albus). Sihr inprägend is de starke Duft, de von den einfach orrer mihrfach tausamensett`ten Lowwblädern utgeiht.

Bi de Wienraut orrer Gordenraut wiesen sei `nen blaggräunen Schimmer up. De Ort ward bet tau 50 cm hoch. In de Sommermaande kamen de 4- orrer 5-telligen Bläuten rut. Ehr gälen Kronbläder sünd an`n Rann` oft utfranst. De Lowwbläder von de Wienraut hemmen ü. a. ätherische Öle, de den Duft bestimmen. Dornäben träden ok noch Furanocumarine up, de giftige Lichtreize besitten. Dat kann dortau führen, dat sick na dat Anfaten von de Planten un ünner Sünnenlicht Hutverännerungen (ü. a. Verfarwen, Blasen) utbillen.

De winterharte Oort benödigt `ne sünnige Lag` un an`n leiwsten `ne dörchlässige, sannige Ierd. In`n Botanischen Gorden steiht sei in lütte Beete von de Offizinellen– un Morphologischen Afdeilung.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.