Maandenplant

Ein von de wichtigsten `nen Wald billenden Lowwböm in Middeleuropa is de Rodbäuk. De tau de Bäukengewächse (Fagaceae) tellende Gattung Fagus umfött 10 Oorten, de all up de Nuurdhalwkugel upträden. De Rodbäuk verbreid`t sick von`n Süden von Skandinavien oewer Middeleuropa bet na Sizilien. In`n Osten wasst disse Oort bet na de Ukraine, Rumänien un de Balkanregion. 

Normalerwies warden de Böm so an 30 m hoch, utnahmswies ok mal bet 50 m. Ehre Stämm warden bet tau 2 m dick. Upfällig is de glatte griese Bork. De eiförmigen Lowwbläder warden bet tau 10 cm lang. Sei rullen sick meistens so von Enn` April (Ostermaand) bet Anfang Mai (Wonnemaand) ut. De Bläuten sünd getrenntgeschlechtig un kamen in`n April/Mai rut. De Noetfrüchte  („Eckern“) sitten tau tweit in `nen vierlappigen Fruchtstand un warden dörch Müüs`, Katteiker un Heister (Eikenschrieger) wegdragen. Se sünd roh `n bäten giftig. 

De Rodbäuk is in ehr Jugend ein sihr schattenduldsamer un later ein stark Schattenspennender Hauptbom in Europa, de de Wälder bild`t. Up ökologisch middelmäßige Standurte wiest sei oewerhaupt keine oewersteigerten Upfälligkeiten up. In`n Botanischen Gorden dröppt man sei välfach in de Biotopanlag „Bäukenholt“ an.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.