Maandenplant

De Lafengel-Stiernbläut (Grewia occidentalis) is `ne lütte ehr Loww afschmietende Bomort. Sei gehürt tau de ortenrieke Gattung von de Stiernbüsche (Grewia) in de Familie von de Malwengewächse (Malvaceae). Disse Gattung wasst in de Tropen un Subtropen von de Ollen Welt. 

De  Lowwbläder von de Lafengel-Stiernbläut sünd lütt un dunkelgräun. Babenup glänzen sei un an`n Rand sünd sei getähnt. In`n Sommer billen sei väle rosafarwten Bläuten von`n Dörchmesser von so 2 cm ut. Jeweils 5 lanzettlich-schmale Kelch- un Kronbläder sünd binah gliek wussen. Sei wesseln sick in twei oewereinanner linggenden stiernorrigen Kreisen af. Dat is bi de Malwengewächsen eine Besonnerheit. Ut ehr kamen 2 bet 5 cm grote, vierdeilige Steinfrüchte hervör. De gelangen an`n intwischen kahlen Struk in`n Winter tau`n Riepen un können furtsens äten warden. 

Dat Verbreidungsrebeit von disse Ort liggt in de Dröchrebeite von Südostafrika. Dor kann man sei von de Küsten an bet up de felsigen Standurte in de Barge andrapen. In`n Botanischen Gorden steiht `ne Kübelplant in`n Rebeit von de Orten mit mediterranet Klima. Dat is näben de Loki-Schmidt-Gewächshüser.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.