Maandenplant

De Gattung Corylopsis gehürt tau de Töwernötgewächse (Hamamelidaceae). Bi dei Verträder von de Familie hannelt sick dat üm Strüker un Böm, de meistendeils in de Nurdhemisphäre upträden. Tau de Gattung Corylopsis tell´n ca. 30 Oorten, de von´n Himalaya bet na Japan verbreidet sünd. De Oorten von de Gattung Corylopsis warden ok as Schienhassel beteikent, dor ehre Lowwbläder un Bläutenstänn´ an de von de Hassel (Corylus) erinnern.

De Armbläutige Blaumenhassel kümmt ut Japan. Dat hannelt sick üm einen bet tau 3 m hogen Struk mit oewerhängende Twiege. De wesselstännigen Lowwbläder sünd runnstännig hartförmig un an´n Rand as utsägt. In´n Harwst farwen sei sick orange-rot. Von März (Lenzmaand) bet April (Ostermaand) kamen dei in Ähren sittende Bläuten rut. Sei besitten hellgäle Kronbläder, de för den Utdrieb von de Lowwbläder dor sünd. Immen un annere Bläutenbesäuker warden in rieker Tahl antreckt. Up dörchlässige Wuchsurte, de vör kolle Ostwinde schützt sünd, wachst de Armbläutige Blaumenhassel ahn Maless.

In´n Botanischen Gorden wachst de Blaumenhassel up de Böschung vör den´n Siedeningang.

Plattdütsch: Christa Winkelmann, Vereinsmaat in'n Plattdütsch-Verein Klönsnack-Rostocker 7 e.V.